Hlutverk Hæfniseturs ferðaþjónustunnar er að starfa á forsendum ferðaþjónustunnar til að efla hæfni og fagmennsku stjórnenda og starfsfólks og stuðla þannig að auknum gæðum, jákvæðri ímynd og arðsemi greinarinnar. Framtíðarsýn Hæfnisetursins er að ferðaþjónustan sé eftirsóknarverður starfsvettvangur með tækifærum til starfsþróunar.

Hluti af því að stuðla að jákvæðri ímynd ferðaþjónustunnar er að eiga samstarf og samtal til að stuðla að góðu orðspori um íslenska ferðaþjónustu, bæði út á við til ferðamanna og í íslensku samfélagi. Sátt og gott orðspor um ferðaþjónustu er ekki sjálfgefið þegar mikill vöxtur er innan greinarinnar á skömmum tíma sem reynir á innviði landsins sem heimsótt er.

Skýr skilaboð heimafólks

Á ferðalagi um Cornwall í Englandi síðastliðið sumar blöstu við límmiðar sem vöktu athygli vegna þess að þar var áritað á fána Cornwall-héraðs: „Fuck your second home“ eða til fjandans með aukaíbúðina þína í lauslegri þýðingu.

Límmiðarnir endurspegluðu skýr skilaboð til þeirra sem hafa fjárfest í fasteignum en hafa ekki fasta búsetu í Cornwall, skilaboðin eru að slíkar fjárfestingar séu ekki jákvæðar fyrir nærsamfélagið. Af sömu ástæðu fóru fram mótmæli á Tenerife 20. apríl síðastliðinn þar sem fimmtán félagasamtök mótmæltu stefnu stjórnvalda í ferðaþjónustu. Þrátt fyrir metfjölda ferðamanna hefur ánægja íbúa minnkað sem rekja má til aukins húsnæðisskorts, umferðarþunga og vatnsskorts.

Framtíðarsýn íslenskrar ferðaþjónustu

Nú liggur fyrir á Alþingi tillaga til þingsályktunar um ferðamálastefnu og aðgerðaáætlun til ársins 2030. Þar er sett fram skýr sýn og markmið um að sambærileg staða og lýst var hér á undan komi ekki upp hér á landi. Í stefnunni kemur fram að: „Íslensk ferðaþjónusta verði leiðandi í sjálfbærri þróun á grunni jafnvægis á milli efnahags-, umhverfis- og samfélagslegra þátta. Rekin verði arðsöm og samkeppnishæf ferðaþjónusta sem starfi í sátt við bæði land og þjóð“.[8306af] Í ritgerð Gylfa Kristjánssonar um sjálfbærnistefnu íslenskrar ferðaþjónustu 2022[ed9c9d] kemur fram að upplifun ferðamanna sé í samræmi við framtíðarsýn ferðaþjónustunnar en að mikil vinna sé fyrir höndum að fá íslensk ferðaþjónustufyrirtæki til að framfylgja ferðamálastefnu stjórnvalda.

Þetta er ágætis lýsing á verkefninu fram undan innan ferðaþjónustunnar og hefur Hæfnisetrið hlutverk í þeirri vegferð. Frá sjónarhóli ferðaþjónustufyrirtækja er eðlilegt að horft sé til aukinnar arðsemi og samkeppnishæfni, meðan starfsfólk í ferðaþjónustu horfir til kjara, starfsþróunarmöguleika og samspils einkalífs og vinnu. Það hefur orðið mikil breyting á viðhorfi til starfa og það er samkeppni um að ráða starfsfólk sem býr yfir ákveðinni þekkingu og hæfni.

Fagbréf atvinnulífsins sem leið til að staðfesta færni

Mikil þekking og færni er til staðar innan ferðaþjónustunnar sem fólk þróar með sér í starfi en hún er ekki alltaf nægilega sýnileg, mælanleg eða staðfest. Þekking byggist upp með reynslu við að sinna störfum, markvissri miðlun á þekkingu innan fyrirtækja og sjálfsnámi. Í nokkrum kjarasamningum sem voru undirritaðir í janúar síðastliðnum var mótuð leið til að hægt væri að staðfesta færni fólks í starfi. Þar er ákvæði um Fagbréf atvinnulífsins[7c4840] sem er leið sem mótuð var í samstarfi Alþýðusambands Íslands og Samtaka atvinnulífsins. …