Lönd með uppsveiflu í hagkerfinu búa oftast við fólksfjölgun sem knúin er áfram af innstreymi innflytjenda á vinnumarkaðinn. Kanada hefur um árabil nýtt sér markvissa fólksflutninga til að mæta hæfniskorti á vinnumarkaði sínum.[85330e] Kanadadísk yfirvöld birtu nýlega stefnu sína um útlendingamál „2023- 2025 Immigration Levels Plan“,[9eb220] sem er yfirgripsmikil áætlun um hvernig best er að nýta fjölgun innflytjenda sem leið til þess að aðstoða fyrirtæki við að finna starfsmenn. Markmið stefnunnar er að laða að fyrirtækjunum fólk með þá þekkingu sem krafist er í lykilgeirum sem knýja hagkerfið áfram, þar á meðal í heilbrigðisþjónustu, fag- og iðngreinum, framleiðslu og tækni. Tilgangur stefnunnar er að mæta og stýra félagslegum og efnahagslegum áskorunum á næstu áratugum.

Í sambærilegri bandarískri stefnuskýrslu, sem ber titilinn „Immigration, Employment Growth, and Economic Dynamism“ frá National Foundation for American Policy (NFAP), kemur fram að innflytjendur ýti undir hagvöxt, fjölgun starfa og efnahagslegan athafnakraft (e. economic dynamism) með framlagi sínu til vinnumarkaðar, frumkvöðlastarfsemi og sem nýir neytendur vegna kaupa á vörum og þjónustu. Að auki heldur skýrslan því fram að vísbendingar séu um að innflytjendur geti hægt á útvistun á framleiðslustarfsemi bandarískra fyrirtækja til annarra landa, sem gefur til kynna mikilvægi innflytjenda til að auka innlenda framleiðslu í Bandaríkjunum.[cc31d9]

Rannsóknir hafa einnig sýnt að landsvæði með hærra hlutfall innflytjenda búa við öflugra hagkerfi og hraðari fjölgun nýrra starfa og stofnaðra fyrirtækja. Við þurfum ekki að leita lengra en til ört stækkandi þorpsins Víkur í Mýrdal til að sjá þróun af þessu tagi hér á landi. Hagvöxtur og þensla í sveitarfélaginu er í mikilli uppsveiflu, þorpið stækkar sem aldrei fyrr. Ferðaþjónusta er drifkrafturinn þar að baki og ákalls um aukið vinnuafl og því er helmingur íbúa af erlendum uppruna í Vík um þessar mundir. Mikið er byggt í sveitarfélaginu og jafnframt fjölgar mannvirkjum. Verið er að fjárfesta í uppbyggingu alls konar innviða og húsnæðis til að mæta eftirspurn sem er tilkomin vegna íbúafjölgunarinnar. Ákall er eftir aukinni þjónustu sem og enn fleiri og fjölbreyttari fyrirtækjum til að mæta hraðri fjölgun íbúa.[861e86]

Innflytjendur hafa tilhneigingu til að vera frumkvöðlar í meira mæli en innfæddir og hærra hlutfall innflytjenda leiðir oft til meiri nýsköpunar og stofnunar fyrirtækja. Samanburðarrannsókn frá Harvard viðskiptaháskólanum leiddi í ljós að innflytjendur leggja að meðaltali tvöfalt meira til frumkvöðlastarfs í Bandaríkjunum en innfæddir.[e2e9e2] Fyrir utan eigin frumkvöðlastarfsemi er framlag innflytjenda einnig til komið sem launþegar og neytendur sem eykur þrótt í viðskiptalífinu og og aukin eftirspurn kallar á fjölbreytni í vörum og þjónustu.

Innflytjendur hafa mikilvægan sess í bæði ört vaxandi og hnignandi geirum hagkerfisins. Eins og innfæddir eru ungir innflytjendur betur menntaðir en þeir sem eru að fara á eftirlaun. Innflytjendur auka sveigjanleika á vinnumarkaði, einkum í Evrópu.[6f81e7] Innflytjendur leggja meira af mörkum til samfélagsins í formi skatta og opinberra gjalda heldur en þeir fá í bætur. Það er mikilvægt að skilja þessi áhrif ef rökræða skal á gagnlegan hátt hlutverk fólksflutninga í hagkerfinu. Slíkar umræður eru nauðsynlegar til að móta stefnu á sviðum sem varða menntun og atvinnu, og hámarka ávinninginn af fólksflutningum, sérstaklega með tilliti til þess að huga þarf að því hvernig best er að bæta atvinnuástand innflytjenda.

Ísland og hagvöxtur tengdur innflytjendum á vinnumarkaði

Sérkafli í nýlegri skýrslu OECD um efnahagsvöxt Íslands „Immigration in Iceland: addressing challenges and unleashing the benefits“, tilgreinir að hröð fjölgun innflytjenda hafi fært Íslandi mikilvægan efnahagslegan ávinning, þar á meðal þar á meðal fleira fólk á vinnualdri og stuðlað að því að mæta eftirspurn eftir vinnuafli fyrir vaxandi greinar, einkum ferðaþjónustu og byggingariðnað. Innflytjendastraumur hefur aukið fjölbreytni í færni og hæfni á vinnumarkaði og aukið fjölbreytileika íbúa. Í skýrslunni var einnig lögð áhersla á að án áframhaldandi fólksflutninga myndi íbúum á vinnualdri á Íslandi fækka um 5% samanlagt til ársins 2050. Auk þess myndi aukin fólksfjölgun tengd innflytjendum …