Síðan árið 2010 hefur höfundur starfað við að bjóða erlendum og innlendum ferðamönnum í alls kyns sérsniðnar sælkeraferðir þar sem leikið er við skynfæri gesta og sérvalin góma-gleði, bæði fljótandi og föst, er rauði þráðurinn í öllum ferðunum. Hjá fyrirtæki höfundar, Magical Iceland, er eingöngu um að ræða sérsniðnar „private” ferðir fyrir fáa gesti. Strax frá upphafi var ljóst að bjóða þyrfti upp á þjónustu fyrir forvitna ferðamenn hérlendis. Útfærsla þjónustunnar felst í því að bjóða ferðaþjónustu sem gæti verið farsæl til langs tíma fyrir land og þjóð. Niðurstaða viðskiptaáætlunarinnar var mjög skýr: Ísland er fyrir ferðamenn – ekki túrista!

Hver er munurinn á ferðamönnum og túristum?

Það er gríðarlegur munur á þessum tveimur hópum og þeir haga sér á gjörólíkan hátt sem skilar sér á marga vegu inn í okkar náttúru, menningu og samfélag.

Ferðamenn ferðast á eigin vegum og oftar en ekki er það parið, fjölskyldan, vinnuferðin eða vinahópurinn sem við tökum á móti. Ferðamennina þyrstir í að kynna sér okkar menningu og þjóð og þeir eru óhræddir við að lenda í ævintýrum og upplifa eitthvað nýtt, framandi og einstakt. Ferðamenn fjárfesta í upplifun og þegar við leiðum þá í gegnum okkar fallega land í sælkeraferðum gerast töfrar sem oftar en ekki enda á vináttu enda deila ferðamennirnir einnig sinni menningu, tilfinningum, lífi, sögu og ævintýrum með okkur ekki síður en við deilum okkar lífi og sögu með þeim. Þetta fallega samband er því sannkallað „win-win” þar sem gestgjafi og gestur njóta báðir góðs af.

Túristar koma aftur á móti til landsins í stórum hópum með allt aðrar væntingar, dagskrá og markmið fyrir sína Íslandsheimsókn. Túristanum líður best í „sinni hjörð” og hefur oftar en ekki hvorki vilja né getu til að prófa eitthvað nýtt eða framandi og hvað þá að tengjast tilfinningaböndum við gestgjafana eða landið.

Stefnumörkun ferðamála

Að þessu sögðu eru mjög sterk rök fyrir því að þessar tvær mismunandi tegundir gesta þrífast ekki vel saman og þar af leiðandi væri farsælast að hafa skýra stefnu varðandi hvaða gesti við bjóðum velkomna. Í ljósi smæðar okkar sem þjóð þurfum við að …