Landbúnaðarháskóli Íslands hefur meginstarfsstöð sína að Hvanneyri í Borgarfirði þar sem búfræðinám hófst árið 1889. Búfræðinámið er tveggja ára starfsmenntanám og er alltaf jafn vinsælt. Stór hluti þess er verklegt nám þar sem farið er yfir fjölmarga undirstöðuþætti sem nauðsynlegt er að kunna skil á við búrekstur. Námið við skólann hefur þróast mikið á þeim 135 árum sem liðin eru frá því fyrstu nemendur hófu nám að Hvanneyri. Árið 1947 voru búvísindi fyrst kennd á háskólastigi og árið 1999 var Landbúnaðarháskólinn á Hvanneyri stofnaður. Skólinn stækkaði síðan árið 2005 með sameiningu hans við Rannsóknastofnun landbúnaðarins (RALA) og Garðyrkjuskóla ríkisins á Reykjum í Landbúnaðarháskóla Íslands.
Í dag býður Landbúnaðarháskólinn, auk búfræðinámsins, upp á háskólanám í þremur deildum; Ræktun & fæðu, Náttúru & skógi og Skipulagi & hönnun. Námið er þannig orðið fjölbreyttara og þverfaglegra en flestir gera sér grein fyrir og umhverfisvísindi og skipulagsmál skipa þar sífellt stærri sess. Grunnnám (BSc nám) er boðið á fimm námsleiðum; búvísindum, hestafræði, náttúru- og umhverfisvísindum, skógfræði og landslagsarkitektúr. Skipulagsfræði er kennd á meistarastigi (MSc) og auk þess er boðið upp á rannsóknamiðað framhaldsnám (MSc og PhD nám) á sviðum skólans. Nýverið hóf Landbúnaðarháskólinn að bjóða upp á alþjóðlegt meistaranám sem hefur hlotið góðar viðtökur, annars vegar um loftslagsbreytingar á norðurslóðum (Environmental changes at higher latitudes) og hins vegar um endurheimt vistkerfa (Restoration ecology).
Stefna Landbúnaðarháskóla Íslands 2024–2028
Ný stefna Landbúnaðarháskóla Íslands 2024–2028 tók gildi 1. janúar sl. Áherslur í nýrri stefnu eru settar fram í fjórum meginköflum:
- Framsækið og spennandi nám
- Rannsóknir, nýsköpun og alþjóðlegt samstarf
- Traustir innviðir, hvetjandi starfsumhverfi og jafnrétti
- Áhrif til framtíðar og ávinningur fyrir samfélagið
Í nýrri stefnu er áfram unnið á þeim grunni sem lagður var með stefnu Landbúnaðarháskóla Íslands 2019–2024. Áhersla er lögð á gæða- og umbótastarf sem styður við stefnu stjórnvalda og áherslna háskóla-, iðnaðar- og nýsköpunarráðherra um nýsköpun, skilvirkni og gagnsæi í fjármögnun háskólastarfsins. Sérstaklega er horft til þess að auka gæði og skilvirkni kennslu með þróun náms og kennsluaðferða, og vinna markvisst með nemendum og nota endurgjöf þeirra til að bæta námið og námsaðstöðuna enn frekar.
Alþjóðlegt samstarf
Evrópusamstarf hefur verið að eflast með aukinni sókn í samkeppnissjóði s.s. Horizon, Erasmus+ og Life, en á vormánuðum 2024 var met slegið í fjölda umsókna sem sendar voru frá Landbúnaðarháskóla Íslands til erlendra samkeppnisssjóða. Á árinu 2023 var einnig sett met í fengnum styrkjum til rannsókna en samþykkt verkefni á árinu 2023 skiluðu um 400 milljónum króna. Þessi tala hefur vaxið á hverju ári undanfarin fimm ár og skilað sér í bættum innviðum og fjölgun framhaldsnemenda, ekki síst nemendum í doktorsnámi. Áætlað er að nýtt met verði slegið á næsta ári með fjölda brautskráðra doktorsnema frá Landbúnaðarháskólanum.
UNIgreen háskólanetið, sem er samstarf átta evrópskra háskóla á sviði landbúnaðar, líftækni og lífvísinda og styrkt af Erasmus, fór vel af stað á síðasta ári. Samstarfsaðilar koma frá Spáni, Póllandi, Ítalíu, Frakklandi, Belgíu, Portúgal og Búlgaríu og meginmarkmiðið er …
