Mörg kíló af nýsköpun

Mynd: Golli

Þórarinn Stefánsson

annar stofnenda Mobilitus

Þegar Friðrik Skúlason fór að selja vírusavarnir um allan heim seint á síðustu öld kom upp ákveðið vandamál. Útflutningsskýrslur kröfðust þess að menn tilgreindu hversu mörg kíló útflutningurinn hefði verið. Eftir talsvert stapp fékkst þessu breytt og Ísland hætti að vera einvörðungu frumframleiðsluhagkerfi.

Frá því internetinu og EES skolaði á strendur okkar hefur staðan gjörbreyst. Nýsköpun hefur verið ástunduð af miklum krafti í flestum útflutningsgeirum með verulegum árangri. Sumt hefur gengið vel, annað síður eins og gengur en heildarstaðan er jákvæð.

Okkur hefur tekist að slíta þetta frá frumframleiðsluhagkerfinu en nýta reynslu þaðan til að byggja upp stöndugan útflutning.

Í hugbúnaðargeiranum hefur byggst upp þekking og reynsla sem kemur nú hverju nýsköpunarfyrirtækinu á fætur öðru á koppinn, þar sem erlendar tekjur myndast upp úr engu. Það þarf ekki að virkja neitt aukreitis til að knýja fartölvurnar sem kóðinn er smíðaður á, þetta er alfarið bókvit sem sett er í askana.

Fjárfesting í syllum

Viðhorfsbreyting hefur orðið gagnvart tilraunum. Verkefni sem ná ekki flugi skila reynslu sem hægt er að byggja næstu verkefni á, sem er dýrmætt.

Þau sem unnið hafa að útflutningsverkefnum í hugbúnaði hafa uppgötvað það hvað heimurinn er stór. Svo stór að jafnvel þegar mörkuðum er skipt upp og sótt er inn á ákveðnar syllur, sem hljóma eins og óttalegt smotterí í íslensku samhengi, getur verið eftir miklu að slægjast.

Skalinn er ótrúlegur. Miðasala fyrir 142 milljarða króna um allan heim rann í gegnum kerfi Mobilitus á árinu 2018. Calidris sá um bestanir á bókunum fyrir stærstu flugfélög heims. CCP hefur fengið hundruð þúsunda til að greiða áskrift að tölvuleik, suma svo árum skiptir.

Aðgengi hugbúnaðargeirans að alþjóðlegum mörkuðum er gott því EES hefur opnað fyrir vinnu Íslendinga erlendis. Þeir skila sér oft til baka í nýsköpunarbransann reynslunni ríkari eftir að hafa fundið vannýtta syllu til að sinna.

Fyrrum starfsmaður Expedia sneri heim og stofnaði KEEPS sem býr til kerfi til að skipta út öllum myndum hótela á pöntunarsíðum. Þúsundir hótela sinnum þúsund kallar á mánuði búa til fínt viðskiptalíkan – upp úr engu nema hugviti.

Þekking á notkun tölvusjónar við að skera niður fiska og fugla nýtist nú sprotafyrirtækinu ELVA GOLF til að bæta golfsveifluna hjá fólki. /

Þekking á útreiknaðri bestun framleiðsluferla er undirstaða PLAIO sem sérhæfir sig í að aðstoða lyfjaframleiðslufyrirtæki að minnka sóun og auka skilvirkni.

Íslenskt fyrirtæki, NeckCare, hefur þróað búnað sem getur bent á hvar nákvæmlega hálsmeiðsli séu, sem eru stórstígar framfarir frá gömlu „Er þetta vont núna? En núna?“ aðferðinni.

Það eru tugir svona íslenskra fyrirtækja á alþjóðamörkuðum sem væri hægt að nefna og ný bætast stöðugt við. Þau eru gjarnan ósýnileg því þau selja lítið sem ekkert á íslenskum markaði og láta því ekkert á sér bera. Allt púðrið er sett í að koma sér á framfæri á sinni syllu erlendis.

Það er helst að tekið sé eftir þeim þegar starfsmenn og eigendur skila sér inn á hátekjulistana eftir að fyrirtækið var selt erlendu stórfyrirtæki.