Umhverfisþing var haldið í upphafi vikunnar og Jóhann Páll Jóhannsson umhverfisráðherra gaf þar í ræðu sinni sterklega til kynna að hann ætlaði að ná árangri í vernd hafsins kringum landið. Nú eru 0,7-2% íslenska hafsvæðisins friðuð eða vernduð en í sumar komu þjóðir heims sér saman um að friða 30% hafsins hið minnsta innan fimm ára.

Umhverfið, loftslagsvandinn, hrun líffræðilegs fjölbreytileika og mengun eru helstu úrlausnarefni á sviði stjórnmála, hagfræði og efnahagsmála í dag. Forsíðugrein vikunnar fer vandlega yfir nýlega rannsókn á vandanum tengdri hinni hagfræðilegu hlið.

Umhverfisþingið sat einnig Halla Tómasdóttir forseti Íslands og átti þar áhugavert samtal þar sem hún meðal annars fjallaði um langtímasýn og árangursmælingar auk þess að nefna mikilvægt breytingaafl í krafti endurskoðenda og alþjóðlegra sjálfbærnistaðla. Einnig vísaði forseti í Tove Jansson höfund Múmínálfanna um að stundum þurfi að ferðast víða og langt til að kunna að meta verðmæti eigin heimkynna.

Í því ljósi mætti sjá speglun á milli ferðalaga Íslendinga og ferðaþjónustunnar hér á Íslandi. Nema markmiðið sé að hér verði byggt upp ákveðið tene-norðursins. Síðari greinin í tölublaði vikunnar fjallar um þær áskoranir stærstu atvinnugreinarinnar.

Samkvæmt nýlegum rannsóknum sem fjallað var um í Bloomberg í vikunni er líklegt að tveir þriðju hlutar þeirra 24.400 dauðsfalla í Evrópu vegna sumarhitanna í ár megi reka til loftslagsbreytinga af manna völdum, eða andlát 16.600 einstaklinga.

Annars var stýrivöxtum evrópska seðlabankans haldið óbreyttum í síðustu viku, á bilinu 2,0-2,4% og stýrivextir bandaríska seðlabankans voru lækkaðir nú í vikunni um fjórðung úr prósentu niður í 4,0-4,25%. Verðbólgan í Evrópu er nú 2,1% og í Bandaríkjunum er hún 2,6%. Tvöfaldi munur stýrivaxtanna í aðeins fjórðungs munar verðbólgu skýrist meðal annars af mismiklum hagvexti og horfum. Það að auki eru tölur af vinnumarkaðinum til vandræða vestanhafs og ógnin um stöðnunarverðbólgu (e. stagflation) vofir þar yfir.