Útbreiðsla máltækni og gervigreindar er nú í veldisvexti. Vöxturinn er jafnvel enn hraðari en í fyrri stórum tæknibyltingum á sínum tíma: örgjörvinn, einmenningstölvan, internetið, snjallsíminn.

Ég spái því að áhrif gervigreindarinnar eigi eftir að verða meiri á mannlegt samfélag og hagkerfi heims en áhrif fyrri byltinganna sem ég nefndi, og voru þau þó ærin. Þeim breytingum þarf að reyna að stýra í sem besta farvegi þannig að tækifæri og kostir þeirra séu hámarkaðir en hættur og gallar lágmarkaðir.

Eitt af því sem gæta þarf að í því sambandi er stuðningur við íslenska tungu (og sögu og menningu), þannig að íslenskur almenningur og atvinnulíf geti nýtt sér gervigreindartæknina á móðurmálinu en þurfi ekki að skipta yfir í ensku til að njóta ávaxta af henni.

Gervigreind mun hafa áhrif á atvinnulíf og vinnumarkað sem eru ef til vill önnur en mörg sáu fyrir sér. Störf sem snúast að miklu leyti um meðferð og umbreytingu upplýsinga munu eiga í vök að verjast, þar á meðal mörg þau störf sem unnin eru með setu við skrifborð og tölvuskjá frá níu til fimm. Og, nokkuð óvænt, innifelur þetta mengi einnig ýmis skapandi störf, svo sem hönnun og textaskrif og gerð ýmiss konar mynd- og myndbandaefnis. Þá er viðbúið að störf við menntir og kennslu taki miklum breytingum.

Störf sem lifa af

Aftur á móti eru ýmis líkamleg og þrívíð störf tiltölulega ónæm fyrir áhrifum gervigreindar. Þar má nefna störf sem lúta að heilbrigði og umönnun fólks, þjónustustörf í ferða- og upplifunargeiranum, og störf sem byggja …