LOVE Synthesizers er nýtt íslenskt sprotafyrirtæki með það að markmiði að framleiða rafhljóðfæri fyrir alþjóðlegan markað. Fyrsta hljóðfærið er á leið í framleiðslu síðar á þessu ári og í dreifingu í byrjun árs 2026. Í þessari grein er ferlinu hingað til lýst í stórum dráttum ásamt því að lýsa hljóðfærinu sem er verið að skapa.

Tilkoma nýrra hljóðfæra er samofin tónlistarsögunni og tónlist er samofin mannkynssögunni. Það er mikilsvert að gefa nýjum hljóðfærum gaum sem eru að koma fram á sjónarsviðið í dag. Það er einnig mikilvægt að skapa umhverfi þar sem ný hljóðfæri og tilraunahljóðfæri geta orðið til. Það er afrek eitt og sér að hanna, þróa og framleiða frumgerð af nýju rafhljóðfæri sem virkar, hvað þá eitthvað sem höfðar bæði til almennings, tónskálda sem og reyndra hljóðfæraleikara. Það gerist ekki af sjálfu sér og útheimtir gríðarlega mikla þróunarvinnu og fjárfestingu. Þar spila stórt hlutverk styrktar- og fjárfestingasjóðir sem og aðrir fjárfestar sem hafa trú á verkefninu. Einnig stofnanir sem veita stuðning og utanumhald við þróunar- og rannsóknarverkefni á hinum ýmsu stigum líkt og Rannís og Tækniþróunarsjóður.

LOVE Synthesizers var einmitt stofnað í kjölfarið af því að fá sprotastyrk frá Tækniþróunarsjóði árið 2023 til þess að þróa áfram og skapa hljóðfæri sem Kári Halldórsson hafði verið að þróa og smíða í tvö ár fram að þeim tíma. Eftir fyrstu stóru hönnunarlotuna varð til kjarnateymi, sem ásamt verktökum hefur unnið síðastliðin tvö ár að áframhaldandi þróun hljóðfærisins sem síðan fékk nafnið FIRST LOVE composer synthesizer.

FIRST LOVE er í grunninn tíðnimótunar-hljóðgervill (e. Frequency Modulation synthesizer ) sem byggir á stafrænni hljóðmótun, aðferð sem kom fyrst í sviðsljósið í frumgerð frá Yamaha árið 1974 en kom svo ekki fyrr en sex árum síðar á markað undir nafninu Yamaha GS1. Fyrsti FM hljóðgervillinn sem var á færi almennings til þess að kaupa og nýta sér var Yamaha DX-7 sem varð undirstaða í hljóðheim margra þekktra og vinsælla laga á níunda áratugnum og síðar.

Margir ættu að kannast við t.d. þessi tvö lög:

Tina Turner – What´s Love Got To Do With It (1984)

T.d. Berlin – Take My Breath Away (1986)

Yamaha DX-7 var markaðssettur þannig að í honum gæti hver sem er hannað frá grunni sitt eigið hljóð og möguleikarnir taldir endalausir. En það sem notendur DX-7 kvörtuðu yfir alveg frá byrjun var erfitt, langsótt og flókið notendaviðmót til þess að breyta og þróa sín eigin hljóð. Flestir notuðu hljóðbankana sem fyrir voru og létu þar við sitja. FM hljóðgervlar hafa síðan haft það orð á sér að vera flóknir og illskiljanlegir en þeir koma oft með algóritma-töflum og flóknum leiðbeiningum. Það er rétt að stærðfræðin á bak við hljóðhönnun í FM hljóðgervli getur verið flókin til að útskýra, og breyturnar, uppskriftirnar af hljóðunum, líta út eins og ritmál geimvera frá annarri vídd fyrir þá sem ekki skilja. En þarf að skilja hvernig hljóðfæri virkar til þess að byrja að nota það? Flókin hljómfræði og tónfræði er ekki það sem er byrjað að kenna í hefðbundnu hljóðfæranámi. Hún væri frekar til þess að halda fólki frá því að læra heldur en að vekja áhuga og löngun til þess að læra meira. Mjög snemma í ferlinu hjá okkur í LOVE synthesizers höfðum við hefðbundin hljóðfæri í huga og leyfðum þeim og okkar reynslu af þeim að vera innblástur fyrir margt í hönnunarferlinu.

Þar komum við að helstu nýsköpuninni í FIRST LOVE, sem er viðmótið og notendaupplifunin. Myndrænt snertiskjá-viðmót í bland við takka til að snúa og ýta á, engar flóknar merkingar eða tungumál á og í sjálfu hljóðfærinu gefur notandanum tækifæri til þess að flæða um og uppgötva hljóðhönnun á myndrænan hátt án þess að þurfa að skilja allt sem býr að baki. Hver sem er getur byrjað þarna og …