Mislangar heimildaskrár birtast með greinum hér í Vísbendingu en aukin áhersla hefur verið á vel gerðar tilvísanir með tenglum bæði fyrir vefútgáfur greina og í hefðbundna rafræna útgáfu. Rétt er að benda á að undirstrikuð orð í vikuritinu eru með lifandi tenglum eins og á vefnum. Hugmyndin er að áskrifendur fái tengsl við bakgrunnstexta, heimildir og ítarlesefni með einum smelli. Oft er notað hið alþjóðlega DOI (Document Object Identifier) kerfi fyrir vísanir í vísindagreinar. En DOI er samfélag samfélaga, rekið af stofnun sem tengist fjölþjóðlegu staðlastarfi og er óhagnaðardrifið framtak til þess að gjaldþrot eða samruni hagnaðardrifinna útgáfufélaga brjóti ekki í sundur tengla í eldri útgáfur.
Fyrir þremur vikum birtust tvær greinar í Vísbendingu sem benda má aftur á, sérstaklega í þessu sambandi þar sem alls yfir fjörtíu vísanir í heimildir fylgdu greinunum tveimur um áskoranir í verðbólgu og háskólamálum. Einnig má benda á þrjár aðrar greinar um alþjóðamál frá því fyrr í ár alls með yfir fimmtíu tenglum, beint úr texta greinar bak við undirstrikuð orð eða úr tilvísunum heimilda aftast í grein. Allar gefa greinarnar sjálfar afbragðs yfirlit um flókin mál á skýran og skorinorðan hátt án þess að krefjast lesturs tilvísana eða heimilda.
Heimildavísanir eru ein grunnstoð alls vísindastarfs. Forsíðugrein vikunnar fjallar á viðtækan hátt um vísindi og aðferð hennar og tekur til umfjöllunar skort á virðingu fyrir vönduðu vísindastarfi. Liggur þar til grundvallar bókin Hitamál eftir Frosta Sigurjónsson sem kom út nýverið. En í tengslum við greinina er birt á vef Vísbendingar ítarleg úttekt greinarhöfundarins Halldórs Björnssonar þar sem vísindalega eru bókarskrifin hrakin lið fyrir lið.
Nýsköpun útfrá vísindastarfi er vissulega ein helsta driffjöður framþróunar íslensks atvinnulífs og áhugavert að lesa síðari grein blaðs vikunnar um greiningu á umhverfi greinarinnar sem þjáist af hávaxtastefnunni eins og aðrir hlutar atvinnulífsins, sem ekki sækja sér alþjóðlega fjármögnun.
