Hagstofna hefur birt upplýsingar um heildarútgjöld til rannsókna og þróunarstarfs á árinu 2022 sem sýna áframhaldandi aukningu í útgjöldum milli ára. Alls var varið 101 milljarði króna til rannsókna og þróunarstarfs árið 2022 en það jafngildir 2,66% af vergri landsframleiðslu (VLF). Aukning útgjalda um 11% dugði þó ekki til að halda í við aukningu í landsframleiðslu og því lækkaði hlutfallið örlítið milli ára. Aukningin í krónum talið milli ára eru 9,9 milljarðar króna. Árið 2018 voru útgjöld til rannsókna og þróunar 56,9 milljarðar króna (2,01%) og nemur aukningin á fjórum árum 44,1 milljarði króna sem er 77% aukning.

Eins og mynd 1 ber með sér er aukningin að stórum hluta til komin vegna aukinna rannsókna og þróunarumsvifa fyrirtækja. Fyrirtæki ráðstafa rúmlega 72% af heildarútgjöldum til rannsókna og þróunarstarfs árið 2022 og hafa útgjöld þeirra aukist um 7,7 milljarða króna frá árinu áður. Aukning háskólastofnana er 1,9 milljarðar króna og aukning annarra opinberra stofnanir er óveruleg eða rúmlega 200 m.kr. Nánari sundurliðun má sjá í töflu 1.

Hagstofan birti nú í þriðja sinn, síðan stofnunin tók við hagtölugerð rannsókna og þróunar, tölur um fjölda starfa og ársverk. Mikil aukning í fjölda starfa var frá árinu 2017 til 2021, sem sjá má á mynd 2, rímar einnig vel við aukin heildarútgjöld. Aukningin á milli áranna 2021 og 2022 er mjög lítil eða 3% sem kemur heim og saman við launaþróun milli þessara ára. Ef horft er á fjölda starfa í rannsóknum og þróun, en ekki ársverk, þá eru 57% hjá fyrirtækjum, tæp 40% í háskólum og tæp 5% hjá öðrum opinberum stofnunum.

Opinber stuðningur við rannsóknir og nýsköpun hefur aukist á undanförnum árum eins og sjá má á mynd 3 af þróun fjárveitinga til helstu sjóða og styrkja til nýsköpunarfyrirtækja á árunum 2015-2023. Þessi aukning hefur án efa ýtt undir aukið umfang rannsókna …