Framleiðniaukningu þarf til að vextir fari upp og eignaverð niður segir hagfræði prófessorinn í seinni grein vikunnar. Ofuráhersla á aukna framleiðni og framleiðslu er komin að vissum endimörkum segir sjálfbærni prófessorinn í fyrri grein vikunnar.

Söguleg tvöföldun vinnuafls á vinnumarkaði, við það að konur komu þangað út af heimilunum, skilaði mikilli framleiðsluaukningu og stöðugum hagvexti sem var meiri en áður hafði þekkst. Það er aðeins einu sinni hægt að fá hagvaxtaraukningu vegna tvöföldunar á vinnuaflinu, þangað til geimverur mæta til jarðar – ef þær skyldu þá vilja vinna fyrir okkur.

Nóbelsverðlaunahafinn í hagfræði í ár, Claudia Goldin, var til umfjöllunar hér í Vísbendingu fyrir nokkrum vikum. Hún sýndi fram á ástæður launamunar kynjanna út frá sögulegum gögnum og kenningum hagfræðinnar. Hún er þó enginn femínískur hagfræðingur en forsíðu grein blaðsins fjallar um þá undirgrein og umhyggjuhagfræðina.

Í mannaflsfrekum umönnununarstörfum er erfitt að ná fram mikilli hagræðingu eða framleiðniaukningu, án þess að draga úr þjónustugæðum. Þó eigum við eftir að sjá hvort nýsköpun geti fært okkur framþróun í þeim efnum með umönnunarróbótum.

Líkt og mikilvægt er í jarðfræðinni að ólík sjónarmið um túlkun rauntímagagna komi fram í umræðunni frá sérfræðingum þá er einnig ljóst að ákveðinn hópur skilar síðan greiningu sinni til stjórnvalda og til þess bær yfirvöld taka ákvörðun um hvað gera skal.

Við viljum gjarnan sjá hér á síðum Vísbendingar líflega efnahagslega umræðu þar sem rökræða um mikilvæga greiningu gagna úr viðskiptalífinu getur farið fram. Jafnframt viljum við með dýpri og fræðilegri vinkli leggja okkar af mörkum til lýðræðislegrar umræðu og upplýstari ákvarðanatöku. Þetta er mikilvægt á óvissutímum líkt og nú eru í alþjóðlega viðskiptakerfinu, við umbreytingar vinnumarkaðsins, á þróun fjármálamarkaða og með efnahagspólitískum óróa, svo dæmi séu nefnd.