Skipulagsmál og samgöngur eru dæmi um mál sem vont er að hafa einangruð eða aðgreind frá öðrum málum, eins og til dæmis húsnæðismálum. Stjórnskipulag er annað dæmi um hina ósýnilegu innviði sem áhrif hafa á samhæfingu ólíkra sviða samfélagsins. Báðar greinar blaðs vikunnar fjalla um húsnæðismál, sú fyrri í sögulegu ljósi og út frá fjármögnunarhliðinni. Hin síðari út frá samgöngumálum og öðrum skipulagslegum þáttum.

Trúin á samkeppnina er óvenjumikil hérlendis þar sem flestir þættir viðskiptalífsins einkennast þó af mikilli fákeppni. Því hefur til dæmis skapast útvíkkun á sviði samkeppninnar þannig að sveitarfélög keppast nú við að kenna mismunandi tímastýringar- og greiðslukerfi leikskóla við nafn bæjarins. Miðlæga staðsetningu atkvæðagreiðslu utan kjörfundar í höfuðborginni hefur þó tekist að samhæfa á einn stað í Kópavogi.

Aukin framleiðni er eitt helsta áherslumál nýsamþykktrar atvinnustefnu, sem er mikilvægt markmið. Hagvaxtarsóknin sem drifin hefur verið áfram undanfarin ár af aðfluttu vinnuafli hefur nú verið aflögð og stefnt að því að auka hagvöxt á mann. Þó verulega óljóst sé hvort það muni takast, auk þess sem hin róttæka óvissa í heimshagkerfinu eykur enn á vandann. Alþjóðleg fjölmiðlaumræða einkennist af vaxandi ótta við yfirvofandi alþjóðlega efnahagskrísu, eins og lesa má í Financial Times í vikunni.

Hver vinnustund skiptir máli varðandi framleiðnina, óháð því hvernig hagvöxtur og mannfjöldi þróast. En mikil hætta er þó á að framleiðniaukning skili sér hvorki til fólks með hærri launum né styttri vinnutíma. Enginn reiknar með kostnaðinum af lengri ferðatíma á götum höfuðborgarsvæðisins. En þannig styttast samvistir með börnum (eða barnabörnum) og við færumst fjær marki Keynes um 15 klukkustunda vinnuviku eftir fjögur ár. En auðvitað gæti sumum þótt jákvætt að þannig aukist hagvöxtur með lengri dagvistunartíma, helst hjá hagnaðardrifnum einkareknum leikskólum.

Svo virðist vera hægt að leysa umferðaröngþveitið með pólitískum áhrifum á stýrikerfi umferðarljósa ef marka má auglýsingar fyrir sveitarstjórnarkosningarnar eftir rúma viku.