Á höfuðborgarsvæðinu eru umsvif á fasteignamarkaði áþekk því sem þau voru í fyrra en um 100 fleiri kaupsamningar voru gerðir á fyrsta ársfjórðungi þessa árs samanborið við árið á undan, eða um 1.796 í ár en 1.694 í fyrra.
Á sama tíma og kaupsamningum fjölgaði seldust færri nýjar íbúðir á höfuðborgarsvæðinu samanborið við í fyrra. Framboð nýrra íbúða til sölu á höfuðborgarsvæðinu hefur jafnframt aukist á milli ára en í upphafi maímánaðar voru um 1.130 nýjar íbúðir til sölu en þær voru um 750 á sama tíma í fyrra.
Á nýliðnum fyrsta ársfjórðungi seldust um 200 nýjar íbúðir á höfuðborgarsvæðinu sem jafngildir um 11% allra kaupsamninga á svæðinu. Um er að ræða mikinn samdrátt frá fyrsta ársfjórðungi ársins 2024 þegar 326 nýjar íbúðir seldust á höfuðborgarsvæðinu. Aftur á móti seldust um 200 fleiri eldri íbúðir í ár samanborið við 2024 sé tekið mið af fyrstu þremur mánuðum ársins.
Erfiðleikar við sölu nýrra íbúða á sama tíma og umsvif á fasteignamarkaði eru töluverð bendir til þess að misræmi sé á milli framboðs og eftirspurnar eftir nýjum íbúðum þessa stundina.
Misræmi milli framboðs og eftirspurnar
Í upphafi maímánaðar voru um 2.700 íbúðir til sölu á höfuðborgarsvæðinu og þar af 1.130 nýjar íbúðir. Um 400 fleiri nýjar íbúðir eru til sölu á höfuðborgarsvæðinu um þessar mundir samanborið við sama tíma í fyrra þegar þær töldu um 750 á höfuðborgarsvæðinu.
Upplýsingar um fjölda kaupsamninga og áætlaðan sölutíma núverandi framboðs geta gefið vísbendingu um „hitastig“ markaðarins þ.e. hvort um sé að ræða seljenda- eða kaupendamarkað. Birgðatími er sá tími sem það tæki að selja þær íbúðir sem til sölu eru ef seldar yrðu jafnmargar íbúðir í hverjum mánuði og seldust mánuðinn áður. Sé birgðatími á bilinu 3 til 6 mánuðir má almennt líta svo á að markaðurinn sé hvorki á valdi kaupenda né seljenda. Birgðatími yfir 6 mánuðum þykir hins vegar vera til marks um sterkan kaupendamarkað, á meðan birgðatími undir 3 mánuðum þykir vera til marks um seljendamarkað.
Á undanförnum þremur mánuðum hefur birgðatími nýrra íbúða á höfuðborgarsvæðinu lengst umtalsvert. Birgðatíminn mældist 16 mánuðir
Fleiri dýrar og nýjar íbúðir til sölu
Líkt og fram kom hér að framan eru ríflega 400 fleiri nýjar íbúðir til sölu á höfuðborgarsvæðinu um þessar mundir samanborið við í maí 2024. Sé rýnt í framboð íbúða eftir verðbilum hefur fjöldi nýrra íbúða sem verðlagðar eru á 100 milljónir króna eða meira aukist um rúman helming á milli ára (úr 205 í 327 íbúðir). Líkt og sjá má á mynd 1 eru flestar nýjar íbúðir til sölu verðlagðar á bilinu 80-100 milljónir króna en álíka margar íbúðir eru til sölu á 60-80 milljónir króna.
Einungis um 2% allra nýrra íbúða á höfuðborgarsvæðinu eru hins vegar verðlagðar undir 60 milljónum króna, eða 28 talsins. Mestu munar í milli á samsetningu framboðs eldri og nýrra íbúða í þeim verðflokki en 14% eldri íbúða til sölu á höfuðborgarsvæðinu eru verðlagðar undir 60 milljónum króna. Þannig eru eldri íbúðir til sölu á stærra verðbili en nýjar íbúðir, líkt og mynd 2 sýnir.
Tæplega 1,1 milljóna fermetraverð nýrra og dýrra íbúða
Líkt og fram kom hér að framan eru einungis 2% nýrra íbúða verðlagðar undir 60 milljónum króna þessa daganna. Þar að auki er fermetraverðið á þeim rúmlega 27% hærra en meðal eldri íbúða í sama verðflokki. Þessi munur helgast af því að meðalstærð nýrra íbúða í þessum verðflokki er 8 fermetrum minni á sama tíma og meðalsöluverð þeirra er tæplega 6 milljón krónum hærra. Meðal íbúða sem verðlagðar eru á bilinu 60-80 milljónir króna annars vegar og 80-100 milljónir króna hins vegar er munur á fermetraverði aftur á móti minni eða á bilinu 4-8%.
Líkt og sjá má á mynd 3 eru nýjar íbúðir sem verðlagðar eru á 100 milljónir króna eða yfir bæði minni og dýrari en eldri íbúðir í sama verðflokki. Fermetraverð nýrra íbúða er 1.088 þúsund krónur samanborið við 955 þúsund krónur meðal eldri íbúða. Fjöldi nýrra íbúða til sölu á þessu verðbili er tvöfalt meiri nú en fyrir ári síðan. Með þéttingu byggðar hafa orðið til fjölbýliskjarnar á …
