Um síðustu helgi var kosið til sveitarstjórna í landinu. Það er þá sem stjórnmálin standa reikningsskil gjörða sinna kjörtímabilið á undan, samhliða því að leggja fram drög að áætlun um stefnu fyrir næsta kjörtímabil, áherslumál og framtíðarþróun.

Í fyrirtækjum og stofnunum á að velja leiðtoga öðruvísi en í stjórnmálum. Þeir standa reikningsskil sinna gjörða í ársreikningum með árlegum fjárhagslegum uppgjörum og skýrsluskilum stjórnenda og stjórnar með upplýsingum um stöðu, þróun, áhættu og óvissuþætti varðandi virðissköpun.

Erfiðlega hefur gengið að innleiða fyllilega evrópskar tilskipanir á þessu sviði hérlendis ásamt því sem að virðismyndun og viðskiptalíkan fyrirtækja nýtur ekki nægjanlegs aga frá hendi löggjafans. Báðar greinarnar í blaði vikunnar fjalla um þessi málefni hvor með sínum hætti.

Viðbótarupplýsingar í skýrsluskilum umfram hið fjárhagslega í reikningsskilum hefur löngum þvælst fyrir hérlendis, þrátt fyrir leiðréttingar lagasetningar eftir ófullnægjandi eða misskilda innleiðingu evrópskra tilskipana yfir langt árabil. Ritstjóri skrifaði áður en hann tók við því hlutverki alls fimm greinar um reikningsskil, tvær á árinu 2020 um ábyrgð stjórnarmanna og mikilvægi viðbótarupplýsinga. Þrjár greinar fjölluðu síðan um reikningsskil og sjálfbærni frá sumrinu 2022 til sjóðheits sumarsins 2023 og ískalds haustsins sama ár.

Þrátt fyrir að mögulegt sé að reikna kostnaðinn við einn hluta þessarar röngu innleiðingar sem ígildi tæplega tíu milljarða þá má einnig búast við að hinn óefnislegi kostnaður sé enn meiri af ófullnægjandi upplýsingagjöf. Þannig er mögulegt að íslensk fyrirtæki verði ekki samkeppnishæf á evrópska markaðinum girði þau sig ekki í brók varðandi loftslagsbókhaldið og þá sérlega reikningsskil á heildaráhrifum, sem snúa að losunarsviði þrjú sem nær yfir alla virðiskeðjuna.

Loftslagsmál og mælanleg áhrif eru þó aðeins einn þáttur varðandi viðbótarupplýsingar sem skal gera grein fyrir í reikningsskilum. Í dag er til dæmis haldið upp á alþjóðlegan dag líffræðilegs fjölbreytileika, einnig hérlendis. Þar er sem ábyrgð stjórnvalda, stofnana og fyrirtækja mikil.