Atvinnustefna fyrir Ísland hefur verið í vinnslu á vegum ríkisstjórnarinnar síðan í haust og var hún kynnt á fundi mánudaginn 20. apríl sl. með bæði tíu ára atvinnustefnu og aðgerðaáætlun til tveggja ára. Í tengslum við mótun stefnunnar var skipað fimm manna atvinnustefnuráð, sem starfar sjálfstætt og veitir ráðgjöf í tengslum við mótun og eftirfylgni atvinnustefnu stjórnvalda. Ráðið starfaði bæði með samstarfshópi ráðuneyta að tillögugerð um mótun atvinnustefnunnar og veitir forsætisráðherra, ráðherranefnd um efnahagsmál og ríkisstjórn ráðgjöf um áherslur og framkvæmd stefnunnar.

Forsíðugrein vikunnar eftir hagfræðinga BHM fjallar um mikilvægi framleiðni með tilliti til menntunar og fjárfestingar í rannsóknum sem skiptir miklu í tengslum við atvinnustefnu.

Áður hefur ekki verið sett formleg atvinnustefna hérlendis, en vissulega hefur verið viss stefna um útgerð og orkuvinnslu á síðari helmingi síðustu aldar, að ógleymdir stefnumörkun um að gera landið að alþjóðlegri fjármálamiðstöð undir lok aldarinnar.

Síðan hefur almennt verið mikil laissez-faire eða afskiptaleysisstefna ríkjandi. Sem byggir á því að leyfa fólki í atvinnulífinu að gera flest það sem því langar, til dæmis í fiskeldi eða ferðaþjónustu, án þess að hið opinbera stæði í vegi fyrir uppbyggingu. Samhliða hefur ríkt mikil andstaða við reglur eða eftirlit í atvinnulífinu.

Frægt er stutt viðtal við fyrrum forsætisráðherra Íslands í vikuritinu The Economist undir lok síðustu aldar, þar sem hann lýsti íslenskum útgerðarmönnum sem þeim allra framleiðnustu í heimi. Tilvitnunin var botnuð af vikuritinu með orðunum að það færi eftir því hvernig skilgreiningin á útgerð og skilgreiningin á framleiðni væri, af enskri háttsemi. Ljóst er að hróður útgerðarmanna landsins berst enn um fjölmiðla álfunnar, nú síðast í danska blaðinu Berlingske.

Það hvort og þá hvernig veiðiheimildir í íslenskri lögsögu, eða jafnvel afrískri, erfist til afkomenda útgerðarmanna er áhugaverð pæling í ljósi síðari greinarinnar í blaði vikunnar sem fjallar um skattlagningu arfs í sögulegu, pólitísku og efnahagslegu ljósi.