Snorra Edda segir frá Ganglera, sem í raun hét Gylfi og var sænskur konungur dulbúinn sem gamall maður, og fór til Ásgarðs til að komast að því hvort æsir byggju yfir yfirnáttúrulegum mætti sem skýrt gæti velgengni þeirra.
Ekki ætti að vera þörf á því að beita blekkingum til að koma boðskap Gylfanna tveggja sem skrifa í Vísbendingu vikunnar inn í æðstu sali efnahagsstjórnunar sitt hvoru megin Kalkofnsvegar. Þar sem þeir hafa báðir setið áður fyrr, annar Gylfinn sem efnahagsráðherra og hinn verið ytri aðili í peningastefnunefnd. Greinar þeirra eiga báðar brýnt erindi beggja vegna vegarins og víðar.
Hér skal ósagt látið hvort velgengni íslenskrar efnahagsstjórnunar megi skýra með því að það séu tveir hagfræðidoktorar sem stýra úr sitt hvoru hásætinu, mögulega sem hár og jafnhár. Þegar tveir Gylfar, báðir einnig hagfræðidoktorar, leggja kollegum sínum til ráð, hér á síðum Vísbendingar, þá eru það mikilvægar upplýsingar fyrir þá og aðra þriðju aðila.
Snorri nefndi fyrsta hluta Eddu sinnar Gylfaginningu og Gangleri hitti þar fyrir í þremur hásætunum æsi dulbúna sem Háan, Jafnháan og Þriðja.
Það hve mikið er gert úr hallarekstrinum hjá hinu opinbera og það hversu alvarlegur hallinn á ríkissjóði er sérstaklega ætti að vekja athygli á þriðja hásæti opinberrar efnahagsstjórnar, það er sveitarfélögunum. Þau virðast hafa meira og minna gleymst í opinberri stefnumörkun fjármálaáætlunar og virðist þannig búið að grafa undan upphaflegum tilgangi hinna tíu ára gömlu laga um opinber fjármál.
Utan úr heimi berast annars þær fréttir að stýrivextir hækki, ávöxtunarkrafa bandarískra ríkisskuldabréfa hafi ekki verið hærri síðan árið 2007 og að Kanada hafi verið boðin aukaaðild að Evrópusambandinu. Það er stórfrétt sem minnkar vægi EES samningsins okkar. Forseti framkvæmdastjórnarinnar minntist í stefnuræðu sinni frá Strassborg ekki aðeins á Kanada í sambandi við aukið öryggishlutverk sambandsins heldur einnig á Úkraínu, Bretland og Noreg. Vonandi telst Ísland með einnig.
